БИШКЕК, 17-сен. — Sputnik. 1916-жылы Үркүндө көз жумгандардын элесине арналып тургузулган мемориалга Кыргызстандын, РФтин, Армениянын президенттери жана Молдованын өкмөт башчысы "Ата-Бейит" комплексине барып, гүлчамбар койду. Бул тууралуу өлкө жетекчисинин маалымат кызматынан кабарлашты.
Путин, Саргсян жана Филип Бишкекте өтүүчү КМШнын саммитине катышуу үчүн келишкен.
1916-жылдагы каргашалуу окуя улуттук-боштондук күрөш катары сыпатталат. Бул кайгылуу окуя эл арасында Үркүн деген ат менен белгилүү.
Мемориал бир нече элементтен турат: уук түрүндөгү үч ири стелланын үстүнө түндүк орнотулуп, андан жоготууну чагылдырган бош үзөңгүлөр түшүп турат. Андан сырткары, 1916-жылдагы окуялардын чыгышы, Үркүн, Ата мекенге кайтуу жана совет бийлигинин орношунан кийинки төрт этабын түшүндүргөн барельеф орнотулган.
