БИШКЕК, 23-сен. — Sputnik. Кемин районунун аймагы аркылуу өтө турчу Алматы — Чолпон-Ата жолу качан аяктары азырынча белгисиз экенин транспорт жана жолдор министри Замирбек Айдаров "Өнүгүү — Прогресс" фракциясынын жыйынында билдирди.
Министр депутаттардын суроолоруна жооп берип жатып, бул боюнча өз оюн төмөнкүчө түшүндүрдү.
"Биз бир көпүрө салып, бир чакырымдык жолго асфальт бетон төшөөбүз керек. Калган бөлүгүн казак тарап өзүнө алган. Азыр алар долбоорду каржылоо булагын аныктап жатышат. Алар мамлекеттик жеке өнөктөштүк негизде ишке ашырууну сунуштап жатышат. Мен министр болуп келгенден кийин бул маселе көтөрүлө элек. Бул боюнча иштер качан башталарын билбейм", — деди ал.
"Өнүгүү — Прогресс" фракциясынын депутаттары аталган жол 2017-жылы май айында иштеп баштайт деп мурда пландалганын айтышты.
