БИШКЕК, 27-сен. — Sputnik. Калифорния бийлигинин билдирүүсүнө караганда окумуштуулар тыгында турган унаалардан энергия өндүрүүгө боло тургандыгын изилдеп чыгуучу масштабдуу иликтөө долбоорун баштады. Бул тууралуу РИА Новости Phys.org сайтындагы маалыматка таянып жазып чыкты.
"Калифорнияда энергияны ушундай жол менен алуу реалдуу деп эсептейм. Унаа жүрүп бара жатканда жана тыгында турганда чыгуучу энергия жылуулук же вибрация аркылуу таркап кетет. Бул энергияны чогултуп алууга толук мүмкүнчүлүк бар", — дейт Калифорниянын Энергетикалык комиссиясынын жетекчисинин орун басары Майкл Грэйвли.
Көптөгөн чиновниктер жана окумуштуулар бул идеянын ишке ашып, иштеп кетишине ишеним артканы менен коммерциялык жактан өзүн өзү актабай калышы мүмкүн деп күдүктөнгөндөр бар. Анткени жолдун асфальтын алмаштырып туруу керек.
Ошол себептен электр энергиясын ушундай өзгөчө жол менен алуу долбооруна штат жетекчилиги эки миллион доллар бөлдү. Эгер бул пилоттук долбоор иштеп кетсе, анда Колифорния бийлиги жолдорду энергетикалык жактан "жашылдандырууга" мындан да чоң аракеттерди жасарын кабарлайт. Грейвлинин берген маалыматына ылайык, Энергетика комиссиясы бул "жашыл жолдор" аркылуу болжол менен колдонулуп жаткан электр энергиясынын жарымын кайтарып алууну көздөшүүдө.
