БИШКЕК, 1-окт. — Sputnik. Москва шаарындагы Борбордук клиникалык ооруканада дарыланып жаткан президент Алмазбек Атамбаев Бишкекке ишемби күнү кайтып келет.
Бул туурасында Sputnik Кыргызстан маалымат агенттигине президенттик аппараттан кабарлашты.
Атамбаев жүрөк аритмиясына чалдыгып, учурда РФ президентинин Иш башкармалыгынын Москвадагы борбордук клиникалык ооруканасына дарыланууга келген. Президенттин маалымат кызматы апта аягында ооруканадан чыга турганын кабарлаган.
Атамбаев 19-сентябрь күнү Нью-Йоркто өтүүчү БУУнун Башкы Ассамблеясынын сессиясына баратып, Стамбулдан өзүн жаман сезип, аны Тез жардам алып кеткен. Андан соң Түркиянын Измир шаарындагы мейманканалардын бирине жайгашкан. Ал эми 23-сентябрда өлкө башчысы ден соолугун чыңдоо үчүн Москва шаарына учуп келген болчу.
