БИШКЕК, 1-окт. – Sputnik. Президент Алмазбек Атамбаевди Москвадагы Борбордук клиникалык ооруканадан чыгаруу үчүн тиешелүү документтер даярдалып жатат. Бул туурасында РИА Новости КРдин Москвадагы элчилигинин пресс-аташеси Гүлбарчын Байымбетовага шилтеме кылып билдирди.
Атамбаев жүрөк аритмиясына чалдыгып, учурда РФ президентинин Иш башкармалыгынын Москвадагы борбордук клиникалык ооруканасына дарыланууга келген. Президенттин маалымат кызматы апта аягында ооруканадан чыга турганын кабарлаган.
"Бүгүн ал эч жакка учпайт. Азыр Москвада",— деп билдирди пресс-аташе.
Байымбетованын айтымында, азырынча Атамбаев аталган ооруканада.
"Кечээ бардык документтерди (ооруканадан чыгаруу үчүн даярдалган кагаздар – ред.) даярдап жатат деп айтышкан. Негизи, жума күнү чыгарат дешкен, бирок, кечээ чыккан жок",— деп билдирген ал.
Анткен менен элчиликтегилер президент Атамбаев бүгүн ооруканадан чыгат деп үмүттөнүп турат.
Атамбаев 19-сентябрь күнү Нью-Йоркто өтүүчү БУУнун Башкы Ассамблеясынын сессиясына баратып, Стамбулдан өзүн жаман сезип, аны Тез жардам алып кеткен. Андан соң Түркиянын Измир шаарындагы мейманканалардын бирине жайгашкан. Ал эми 23-сентябрда өлкө башчысы ден соолугун чыңдоо үчүн Москва шаарына учуп келген болчу.
