Рамзан Кадыровдун тестиер балдары ММА турнирине чыгып, сынга кабылды

БИШКЕК, 6-окт. — Sputnik. Грозный шаарында балдардын катышуусунда өткөн мушташ оюндарын эч кандай актоого болбостугун Россиянын ММА кеңешинин президенти Федор Емельяненко өзүнүн Instagram баракчасына жазды. 

Шейшемби күнү Грозный шаарында өткөн ММА оюндарынын турниринде Чеченстандын президенти Рамзан Кадыровдун 10 жашар уулу Ахмад атаандашын 14 секундада нокаут менен жеңген.

Анын Эли жана Адам аттуу эки досу 27 жана 35 килограммдык салмактагы көрсөтмө оюндарда атаандаштарын жеңип алган.

"Кечээ балдардын мушташ оюндары көрсөтмө катары делгени менен эл кадимки эле мушташты көрдү. Россиянын Спорт министрлиги бекиткен эрежеге ылайык, 21 жашка чейинки спортчулар рингге атайын баш кийим жана буту-колуна кийилген буюмдары менен, ал эми 11 жашка чейинки балдар атайын даярдалган чыптап турган кийим же футболка менен чыгышы керек эле", — деп айтылган анда.

Емельяненко 21 жаштан тарта кайсы бир чектөөлөр коюларын айтты.

"Беттеш кесипкөй жана чоң спортчулар үчүн кабыл алынган эрежелердин негизинде өткөрүлгөн, мындай болбойт, 12 жашка чейинки балдардын ММА эрежелери менен мушташуусуна уруксат берилбейт. Андыктан Грозныйда өткөн турнир акылга сыйгыс болду, ал эми балдардын катышканын эч бир нерсе менен актоого болбойт",— деп кошумчалаган Емельяненко.

Андан сырткары, ММА президенти балдар катышкан беттеш теледен түз эфир менен көрсөтүлгөнүнө нааразылыгын айткан.

"Матч", "Боец" телеканалдары балдардын мушташын эмне үчүн түз эфир менен бергени таптакыр түшүнүксүз. 12 жашка чейинки балдардын мындай оюнга киргизилбей тургандыгын айтпай эле коёюн, кубаттап, кубанып турган чоңдордун көз алдында 8 жашар кичинекейлер бири-бирин былчылдатып уруп жатты. Чоңдор үчүн баланын ден соолугунан ага кесепетин тийгизген оюн, көрүнүш артык болуп кеткенби?!"— деп суроо салган.

Емельяненко бул аны абдан нааразы кылгандыгын жана мындай көрүнүшкө Чеченстан президенти Рамзан Кадыровдун өзү көз салып отурганын жазган.

"Анын спорт министрлигинен шайланган кеңешчилери 12 жашка чейинки балдар мушташ оюндарына катышпай тургандыгын айткан эмеспи? Биринчи иретте биз өсүп келе жаткан муундарга үлгү болушубуз керек эмеспи. Балдардын чоңдор менен кошо жарышып мындай мушташ оюндарына катышуусу алардын спорттук карьерасына эле эмес, ден соолугуна, психологиясына да зыянын тийгизет",— деп жазган Емельяненко.

ММА (эрежесиз эр уруш) — аралаш мушташ боюнча эл аралык турнирлер дүйнөнүн көп өлкөлөрүндө өткөрүлүп келет.