БИШКЕК, 7-окт. — Sputnik. Коомчулук тарабынан Кыргызстандагы бийик ашууларда ары-бери каттам учурунда тейлөө шарттарын жакшыртуу максатында мамлекеттик органдан сырткары, ыктыярчыларды тартып, жолго намазкана куруу демилгеси сунушталууда.
Ал кышында өзгөчө Төө-Ашуу, Долон, Ала-Бел сыяктуу ашууларда жол каттамы кыйындаарын айтып, андан чыгуу жолун сунуштаган. Ашуулардын эки бетиндеги өйдөгө көтөрүлгөн жерлерде жолоочулар токтоп, эс алып кете турган намазкана куруп, ага күндүн энергиясы менен иштеген электр жарыгын орнотуу керек деген пикирде.
"Мындай жайларды кышында машакаты көп Төө-Ашуу, Долон, Ала-Бел сыяктуу ашуулардын түбүнө салуу керек. Себеби, кыш күрөөдө автоунаалар чыга албай, токтоп, тоңуп калып, же жол тыгын болгон учурлар көп", — деди Талас уулу.
Ал өзү көп каттап жүргөн Бишкек — Торугарт жолундагы Долон ашуусун мисал келтирди.
Эмне үчүн намазкана деген суроого ал төмөнкүчө жооп берди.
"Намазкана дегенде адамдар башкача карайт, болбосо ал жер аракканага айланып кетет. Таза да кармап, жоопкерчиликтүү мамиле жасаганга аракет кылышат деген ой менен сунушталып жатат",— деди демилгечи.
Ал Долон аймагы Нарын облусуна карагандыктан, өкмөттүн аталган облус боюнча өкүлчүлүгүнө кайрылып, маселени чечүү жагын сүйлөшүү каралып жатканын белгиледи.
Демилгечи бул жайларды салууга ишкерлерди тартуу ыңгайлуу болуп тургандыгын, ага анча көп каражат кетпейт деген пикирин айтты.
