БИШКЕК, 8-окт. — Sputnik. Мамлекеттик бажы кызматы Сваровски таштары чөгөрүлгөн сааттарды сатып алуу үчүн жарыяланган тендерден баш тартты. Бул тууралуу аталган мекеме билдирди.
Буга чейин тендер өткөрүү боюнча жарыя Мамлекеттик сатып алуулар порталына чыккан. Социалдык тармакта мындай кадам кызуу талкууга алынып, пайдалануучулар 648 миң сомго саат сатып алуунун максатына кызыгышкан.
Үстүбүздөгү жылдын декабрь айында Кыргызстандын Мамлекеттик бажы кызматынын түзүлгөнүнө 25 жыл толот. Мааракеге Дүйнөлүк бажы уюмунун өкүлдөрү келет. Ал эми аталган кол сааттар жогорку даражалуу меймандарга белек катары берилмек. Мында 40 саат эркектер үчүн, ал эми 20сы айымдарга арналган.
Бир саат 10 миң 800 сомго бааланып, каражат мамлекеттик бюджеттен бөлүнмөк. Булгаары боолуу кварц механизм менен иштеген саат Сваровски таштары менен шөкөттөлүп, сөзсүз Швейцариядан жасалышы керек болчу.
