БИШКЕК, 19-окт. — Sputnik. Бишкекте Айыл чарба азыктарын экспорттоону өнүктүрүү боюнча семинар өтүүдө. Бул тууралуу ФАОнун (БУУнун азык-түлүк жана тамак-аш программасы) башкы кеңсесинин соода базар бөлүмүнүн экономисти Екатерина Кривонос билдирди.
Анын айтымында, иш-чарага ФАОнун, эл аралык соода борборлорунун, Казакстан жана Украина өлкөлөрүнүн адистери келишти.
"Эки күндүк семинарда чет элдик адистерден кеп-кеңештери эске алынып, азык-түлүктөрдү экспорттоону өнүктүрүү боюнча иш-аракеттер башталат. Эгер кыргызстандык ишкерлер тарабынан долбоорлор сунушталса, ФАО материалдык жактан колдоого даяр", — дейт Кривонос.
Экономист семинардын жүрүшүндө айтылган сын-пикирлерди айтып берди.
"Учурда айрым азыктарга санитардык жана фитосанитардык талаптар коюлуп, ЕАЭБге кирбей токтоп турат. Бул сыяктуу тоскоолдуктарды чечүү керек", — деп айтты ФАОнун өкүлү.
Ошондой эле Кривонос иш-чаранын башкы максаты айыл чарба азыктарын экспорттоону өнүктүрүү планын ишке ашыруу үчүн улуттук, эл аралык эксперттердин жана мамлекеттик түзүмдөрдүн арасында тажрыйба алмашуу экенин белгиледи.
