БИШКЕК, 21-окт. — Sputnik. Бүгүн Гапар Айтиев атындагы кыргыз улуттук көркөм сүрөт музейинде КРдин эл сүрөтчүсү Турсунбек Койчиевдин элесине арналган көргөзмө баштала турганын Маданият, маалымат жана туризм министрлиги кабарлады.
Билдирүүгө ылайык, экспозицияга сүрөтчүнүн жеке коллекциясы менен музейдин архивиндеги 100гө чукул эмгек кирди. Көргөзмө Койчиевдин чыгармачылык жолун чагылдырат.
Иш-чара 21-октябрдан 5-ноябрга чейин уланат.
Турсунбек Койчиев 1941-жылы 14-октябрь күнү Чүйдө туулган. Чыгармачылыгы 1965-жылдан башталып, Италия, Швеция, Бельгиядагы эл аралык көргөзмөлөргө катышып келген.
