БИШКЕК, 25-окт. — Sputnik. Кара-Суу районундагы Мамажан айылында аш-тойго жумшалчу чыгымдын көлөмү азая баштаганын Мамажан айылынын башчысы Жаныбек Бакыев билдирди.
Анын айтымында, учурда тойго жаштар кымбат баалуу кортеждер менен эмес, көп орундуу автобус жана бустар менен чыгып, жамандыкта союлуучу жандыктын саны да кыскарган. Бул демилге мындан үч жыл мурда жергиликтүү жашоочулардын арыздарынын негизинде ыксыз чыгымдарды кыскартуу максатында көтөрүлгөн.
Ал белгилегендей, бул демилгеге каршылык көрсөткөндөр да жок эмес.
"Андай жарандарга айыл өкмөт жетекчилиги тарабынан алгач эскертүү берилет",— деди айыл башчы.
"Маркумдардын жылдыгын өткөрүү, бейшембилик өткөрүү, кийит кийгизүү сыяктуу салттар да кыскартылып, учурда анын ордуна жылдык өткөрүүнү пландаштырган үй- бүлөлөр айылдагы көчөлөргө шагыл төгүп же асфальт төшөп бере баштады. Анткени кийит кийгизип, бодо мал союп, ысырап кылуунун ордуна каалоочулар бир көчөнү ондоп шагыл төгүп берсе бул жергиликтүү жашоочулар үйүн аябай чоң пайда", — деди Бакыев.
Ал баса белгилегендей, ысырапкерчиликке алып келүүчү ырым-жырымдар айыл ичинде толугу менен кыскара элек.
"Убакыттын өтүшү менен эл өзү да түшүнүп бара жатат",— деди ал.
Мамажан айылында 711 кожолук, 3 миң 32 киши жашайт.
