БИШКЕК, 26-окт. —Sputnik. Көпчүлүк коалициядагы чечимдер башка жактан чыгып жатты. Бул тууралуу "Өнүгүү — Прогресс" фракциясынын лидери Бакыт Төрөбаев парламентте сүйлөп жатып билдирди.
Эске сала кетсек, дүйшөмбү күнү КСДП фракциясы расмий түрдө коалициядан чыга тургандыгын билдирген. Аталган фракция көпчүлүк коалициядагы акаевчи, бакиевчи делгендер жана мародерчулукка шектелгендер менен бир боло албай тургандыгын айткан.
"Биз далил жана аргумент менен сүйлөшүбүз керек. Баш мыйзамды өзгөртүү тууралуу демилге көтөрүлгөндө биздин фракция 15 берене боюнча сунуш берсек, жооп болбоду. Конституция тууралуу эки ирет фракция жыйын куруп, тиешелүү адамдарды чакырсак келбей коюшту. Ошондон улам биздин ой менен эч ким эсептешпей тургандыгын түшүндүк", — деди Төрөбаев.
"Өнүгүү — Прогресс" фракциясынын лидери чечимдер көпчүлүк коалицияда эмес, башка жакта чечилип жатты деген пикирин кошумчалады.
Ал эми кийинки сөз кезегин алган КСДП фракциясынын лидери Иса Өмүркулов "Өнүгүү — Прогресс" фракциясынын лидери Бакыт Төрөбаев Баш мыйзамды өзгөртүү демилгесин колдоп, кийин ойт бергенин айтты.
"Бакыт Эргешович, коалиция лидерин шайлоо боюнча кабинетиңизге чейин бардым. Бириңер да ынаган жоксуңар. Анан мага керекпи? Конституция боюнча өзгөртүүнү башында колдоп, кийин ойт бердиңиз. Президентке чейин кирем деп чыктыңыз. Президенттин кандай тиешеси бар?" — деди Өмүркулов.
Ал ЖКнын тармактык комитетинин төрагалыгы КСДП фракциясына тиешелүү экенин айтып, талашып чыктыңар деген пикирин кошумчалады.
Ал эми "Кыргызстан" фракциясынын лидери Канат Исаев бүгүнкү күндө өкмөт башчы да, төрага да КСДП фракциясынан шайлангандыгын айтып, тармактык комитетинин төрагалыгын башка фракцияга берсе болмоктугун белгиледи.
