Рада депутаты бир жылда 39 млрд. доллар таап Соростон ашып кетти

БИШКЕК, 31-окт. — Sputnik. Украинанын Улуттук "Айдар" батальонунун мурдагы командири, Жогорку Раданын депутаты Сергей Мельничук 2015-жылдагы декларациясына бир жылда триллион гривен (38,7 миллиард доллар) тапканын көрсөткөнүн РИА Новости жазып чыкты. 

Депутаттын декларацияда көрсөткөн каражаты Украинанын алтын валюталык резервинен (14,5 миллиард доллар) эки жарым эсеге көп болуп чыккан. Мельничуктун маянасы 73,5 миң гривенди (2,9  миң доллар) түзөт. Электрондук декларацияда көрсөтүлгөндөй депутаттын 1994-жылкы Jeep Grand Cherokee менен  1988-жылкы "ГАЗ 2411" үлгүсүндөгү унаалары бар. Ошондой эле Винницада 65 чарчы метрлик батири жана 2,45 миң чарчы метрлик жер участогуна ээлик кылат. 

Анткен менен украиналык жалпыга маалымдоо каражаттарынын маалыматына караганда депутат чындыгында эле ушунча каражатка ээлик кылар-кылбасы белгисиз. "Украинская правда" басылмасы эл өкүлү декларацияны толтуруп жатып жаңылышканын же тамашалап койгонун болжолдоп жатат. 

Мельничук Forbes журналынын версиясы боюнча дүйнө жүзүндөгү эң бай адамдардын тизмесинде 12-болуп турмак. Ал кирешеси 38,5 миллиард долларды түзгөн GOOGLE компаниясынын негиздөөчүсү Сергей Бринди дагы артта калтырмак. Украиналык депутаттын акчасы миллиардер Жорж Соростун каражатынан дээрлик 14 миллиардга ашып турат. Сорос Forbes журналынын версиясы боюнча өткөн жылы 24,9 миллиард доллар таап эң бай адамдардын тизмесинде 28-орунга ээ болгон.       

Сергей Мельничук "Айдардагы" командирдик постун таштап депутат болгон. Бирок жай айында Рада анын кол тийбестигин алып кылмыш ишин козгоого уруксатын берген.