БИШКЕК, 5-ноя. — Sputnik. Чечен республикасынын башчысы Рамзан Кадыров Түркиянын президенти Режеп Эрдогандан өлкө аймагында кармалган үч террорчуну өткөрүп берүүнү суранууда. Бул тууралуу Кадыровдун расмий порталында жарыяланган деп жазат РИА Новости.
Мурда Кадыров Чечен республикасына тийиштүү болгон Махран Саидов, Асланбек Вадалов жана Тархан Газиев аттуу үч согушкер Түркия мамлекетинде кармалганын билдирген. Анын айтымында, алардын аты "Россияга жана дүйнө жүзүнө кеңири тараган". Согушкерлердин ар бири көптөгөн террордук иштерди уюштуруп, аскерлерди, полиция кызматкерлерин жана жөнөкөй адамдарды өлтүргөн.
"Сизге терең өтүнүч менен кылмышкерлерди бизге өткөрүп берүүңүздү суранып кайрылам. Чагымчылдарды жазага тартуу жана соттоо чоң мааниге ээ", — деп жазылат билдирүүдө.
Кадыров ошондой эле өлкөдө дүйнөгө атагы чыккан террористтер жүргөндө мамлекеттин коопсуздугун ойлобой коюуга мүмкүн эместигин жана бул маселе Түркияга да тиешелүү экенин айтып өткөн.
