Ош, 8-ноя. — Sputnik. 20 жылдан бери көчүп-конуп жашап, алты баланын, анын ичинен экөө шал болуп ооруган эки бөбөктүн ата-энесине Оштогу "Максат" кайрымдуулук фонду эки бөлмөлүү там салып берди.
"Турмушума зээним кейип, эзилсем да жашоодо жакшы адамдар бар экенин угуп, жүрөгүм жылыйт. Турмушубуздун оор экенин уккан Оштогу "Максат" кайрымдуулук фонду жакында биз менен байланышып, Куршаб айылына эки бөлмөлүү там салып берди", — деди биз менен сүйлөшүп жатып ыраазы болгон балдардын энеси Гүлмира Жакыпова.
Өзгөн районунун Куршаб айылынын тургуну 37 жаштагы Гүлмира Жакыпова үч уул менен үч кыздын энеси. Анын эки уулу шал илдетине чалдыккандыктан баса албай төшөктө жатат.
Буга чейин үй-бүлөнүн сегиз мүчөсү баш калкалар үйү жок болгондуктан 20 жылдан бери көчүп-конуп, ар кайсы аймактарда ижарага батир алып же тууган-тааныштардын үйлөрүндө жашап келген.
Көздөн чачыраган кубанычтын учкундары
"Учурда толугу менен бүтпөсө да кар жаап күн суук болуп кеткендиктен үйгө кирүүгө мажбур болдук. Кыйын күндө жардам колун сунган боорукер адамдарга чексиз ыраазымын", — деди ал.
Биздин маектеш балдарынын кантип майып болуп калганын башынан баштап айтып отурду.
Жакыпова үчүнчү перзенти Илгиз төрөлгөндөн 40 күндөн кийин тили артка кетип, көгөрүп, талмасы кармап калганын эстеп отурду. Дарыгерлер "итий" деген диагноз коюшкан экен. Аны "кыргызчылык" жол менен дарылайлы деп молдо-табыпка алып барып окутуп да көрүшүптүр.
"Илгиз боюмда алты айлык кезинде сасык тумоого чалдыгып ооруп калдым, андан сырткары эмнегедир алма жеп ууланып катуу жыгылдым. Кыштын күнү анарга өтө катуу талгак болгом. Бирок сатып алганга тыйыныбыз жок, көр турмуштун айынан анар жегим келип ушунчалык жүрөгүм эзилип ыйлачу элем. Каным да аз болгондуктан менин да организмим, уулум да анарды каалаган тура. Ошондо талгагымды кандырсам, уулум майып болбойт беле деп арман кылам", — деди Жакыпова.
Учурда Илгиз 14 жашта, 9 жылдан бери төшөктө жатат.
Ал үй-бүлөнүн кожоюну жогорку билимдүү болбогондуктан убактылуу жумуштарда жалданып иштеп, жан бакканга тыйын тапкандыгын айтты.
"Кайнатам 35 жашында каза болуп калып, тогуз бир туугандын түйшүгү да жолдошумдун мойнунда болчу. Анын үстүнө жокчулук, жетишпеген турмуш да бизди ушул оор жагдайга түрттү", — деди Жакыпова.
Бул үй-бүлөнүн дагы бир 12 жаштагы уулу баспай, майыптар арабасында күн кечирүүдө.
Ал жолдошунун күнүмдүк тапкан 200-300 cому балдарынын такма жалаягына да жетпей жатканын айта кетти.
Жанар тоодой кайрат берген төрт жаштагы Жанаргүл
Үй-бүлөнүн бешинчи баласы — төрт жаштагы Жанаргүл жана эң кенжеси Бегимай эки жашта.
Апасы төрт жашар кыздын чоңдордун ичин жылыта турган сөздөрүн айтып берди.
"Ошол төрт жаштагы чүрпөм мага кадимкидей кайрат берет. Майып агаларын көрүп өзүнчө ой жоруйт окшойт. Чоңойсо дарыгер болуп, адам баласын эле эмес, аксап калган тоокторду, койлорду кадимкидей бастырууну тилек кылып жүрөт", — деди жылмайып балдардын энеси.
Гүлмира айым 19 жаштагы уулу Чыңгыз Оштогу окуу жайлардын биринин 2-курсунун студенти экендигин, уулунун жогорку билим алып жаткандыгына каниет кыларын билдирди.
