БИШКЕК, 14-ноя. — Sputnik. Премьер-министр Сооронбай Жээнбеков БШК төрайымы Нуржан Шайлдабекованы кабыл алганын өкмөттүн маалымат кызматы билдирди.
Жолугушууда жергиликтүү кеңештерге депутаттарды шайлоого жана референдумга даярдык көрүү, аны өткөрүү боюнча уюштуруу маселелери, мамлекеттик жана жергиликтүү өз алдынча башкаруу органдарынын өз ара иштешүүсү, ошондой эле шайлоо комиссияларын каржылоо жана материалдык-техникалык жактан камсыздоо маселелери талкууланды.
"Участкалык аймактык комиссиялар жер-жерлердеги мамлекеттик органдар жана жергиликтүү өз алдынча башкаруу органдары менен тыгыз иш алып барууда, участкаларды материалдык-техникалык жактан камсыздоого көмөк көрсөтүлгөн", – деди Шайлдабекова.
Анын айтымында, учурда шайлоо участкалары ачылып, шайлоочулар тизмесин тактоо процесси 26-ноябрга дейре улантылат.
Белгилей кетсек, президент Алмазбек Атамбаевдин жарлыгы менен үстүбүздөгү жылдын 11-декабрына жергиликтүү кеңешке шайлоо жана референдум өткөрүү белгиленген.
