Аны көпчүлүк күчтүү үнүнөн тааныйт. Өзү дагы чакырган жерлерге, жолугушууларга барганда "Ой, мен сени элүүдөн өткөн киши го десе, балам менен тең турбайсыңбы" деп улуу эле кишилер да айтып каларын билдирди.
Андан сырткары "Даңазалуу доор" сериалындагы Султан Сулаймандын үнүн кантип коштоп калганын, ага башында кимдер талапкер болгонун айтып берди.
"Конкурска Дүйшөн Байдөбөтов, ыраматылык Мукамбет Токтобаев, Марат Козукеев сыяктуу чоң актерлор катышыптыр. Алардын арасынан Марат байке калыптыр. Эки-үч жумадан кийин мага чалышты, "Жоки,сен дагы келчи, үн тандай албай жатабыз" деп. Мейли деп үзүндү окуп алып кеткем. Кайра чалып "болбой эле сени бекитишти, куттуктайбыз, келишим түзүп кетиңиз" деп күлүп калышкан. Мен дагы аябай сүйүнүп, жумушум катары кабыл алгам. Мындай чоң долбоор экенин билген эмесмин! Барсам 250дөн ашык серия экен. Анан ошол жакка эле эки жылдык өмүрүм кетпедиби", — деди актер.
Жанжигит уулу буга чейин Чыңгыз хандын, "Гладиатордогу" Максимустун, "Акыркы Самурайда" Том Круздун үнүн коштогонун да кошумчалады.
