БИШКЕК, 29-ноя. — Sputnik. Бириккен Улуттар Уюмунун Коопсуздук Кеңешинин беш мүчөсү Түндүк Кореяга карата резолюция долбоору боюнча бир чечимге келгени тууралуу Кытайдын тышкы иштер министрлигинин расмий өкүлү Гэн Шуан билдирди. Бул тууралуу РИА Новости агенттиги маалымдады.
Буга чейин Рейтер агенттиги билдиргендей, БУУнун Коопсуздук Кеңеши Түндүк Кореянын сентябрда өзөктүк куралды сынаганына каршы жаңы санкцияларды киргизүү боюнча шаршемби күнү добуш берүү өткөрүүгө даяр. Батыш өлкөлөрүнүн бир дипломаты билдиргендей, Түндүк Кореяга карата колдонула турган жаңы чектөөчү чаралар көмүрдү Кытайга экспорттоосуна таасирин тийгизет.
Түндүк Корея 5-сентябрда үч баллистикалык ракетаны сынаган. Бул ракеталар миң чакырым аралыкта жайгашкан Жапониянын аба коопсуздугу чегине жеткен. Ал эми 9-сентябрда болсо, БУУнун Коопсуздук Кеңешинин тыюу салуусуна карабастан бешинчи өзөктүк куралын сынаган.
9-сентябрда БУУнун Коопсуздук Кеңеши кезексиз жыйынга чогулуп, жыйынтыгында Түндүк Кореяга карата чара колдонуу үстүндө иштөө чечими кабыл алынган.
