БИШКЕК, 11-дек. — Sputnik. Бүгүн Кыргызстанда жергиликтүү кеңештерге шайлоо жана Баш мыйзамды өзгөртүү боюнча референдум өтүүдө.
Ош шаары
Ош шаарында саат 13:00гө карата шайлоочулардын 14 пайызы добуш берди бул тууралуу БШКнын Ош облусу боюнча өкүлү Расулбек Кадыров аймактык кабарчыга билдирди.
"13:00гө карата Ош шаарында 18 903 жаран добуш берди. Ош шаарында жалпы 73 шайлоо тилкесинде добуш берүү жүрүп жатат. Эртең менен айрым шайлоо тилкелеринде аппараттар иштебей калган. Адистер ал тилкелерге барып аппараттарды оңдоду азыр иштеп жатат. Учурда аппарат иштебей калган тилкелер жок", — деди ал.
Түшкө маал шайлоо тилкелериндеги жарандардын санынын аздыгын Кадыров шайлоочулар эртең менен өз жумуштарын бүтүрүп жүргөнү менен түшүндүрүп, түштөн кийин активдешет деген үмүттө турганын билдирди.
Ош шаарында жалпы 132 миң 694 шайлоочу бар.
Жалал-Абад шаары
Жалал-Абад шаарындагы 2100-участкасында шайлоочулар бир сааттан бери кезекте турганын аймактык кабарчы билдирди. Элдин чогулуп калышына компьютерлер жана аппараттардын иштебей жатканы себеп болгонун адистер айтышууда.
Ал эми шаардагы 2104-участкасында электорндук урналар иштебей, эски урналар иштетилип жүздөгөн адамдар кезекте турат. №2101-участкасында да эски урналар иштетилди.
"Электрондук урнанын флешкасы бузулуп калып жарандар шайлоого катышпастан үйлөрүнө кайта баштагандыктан шайлоо комиссиясы чечим чыгарып эски урнаны иштетүүгө уруксат берген. Аталган жайда 1654 шайлоочу болсо таңкы 8:00дөн баштап түшкү саат 12:30 чейин болгону 185 шайлоочу өз укугун пайдалана алышты. Мындай иштин солгундоосу техникалык катачылыктан болгонун адистер белгилешүүдө", — деди аймактык кабарчы.
Ал эми түшкү саат 12:00гө алынган маалыматка ылайык Жалал-Абадда 57768 жаран добуш берген. Мындай маалыматты КР өкмөтүнүн Жалал-Абад облусундагы өкүлүнүн биринчи орун басары Мамасалы Акматов билдирди.
Белгилей кетсек, облус боюнча шайлоочулардын жалпы саны 474 миңди түзөт.
Талас шаары
Таласта 116 шайлоо участкасы бар. Анын 110 участкасында жергиликтүү кеңештин депутаттарын шайлоо жүрүп жатат. Калган 6 шайлоо участкасында жергиликтүү кеңешке шайлоо май айында өткөн. Облус боюнча референдумга 130025 шайлоочу катышат. Саат 13:00гө алынган маалымат боюнча 28069 шайлоочу добуш берди.
Балыкчы шаары
Балыкчы шаарында саат 2:00гө чейин, 4377 адам Референдумга добуш бергенин аймактык кабарчы билдирди.
Балыкчы шаарындагы 16 шайлоо участогунда Баш мыйзамга өзгөртүү жана толуктоолорду киргизүү үчүн добуш берүү уланып жатканын аймактык кабарчы билдирди.
3008-шайлоо участкасынын төрайымы Венера Айтиеванын айтымында, бул шайлоо участкасында 2876 шайлоочу добуш берет. Саат 13:00гө чейин 400 адам добуш берип, көчмө урна менен 1 адам добуш берген.
