Өмүрүндө колуна камера кармап көрбөгөн карапайым кыргыз жигити популярдуу сериалдарды кантип тартып калганын журналист Эламан Карымшаков анын өзү менен байланышып, ушул суроонун тегерегинде маектешти.
— Москвага кандай жумушта иштейм деп бардыңыз эле?
— Мен 2007-жылы эл катары эле жумуш издеп келгем. Эч ким мени жылуу-жумшак орун даярдап күтүп алган эмес. Башында курулуш тармагында, булочка бышырган жерде, жада калса көчө шыпырып да иштедим. Дем алыш күндөрү күнүмдүк жумуштарда иштеп келчүмүн. Бир күнү ошондой жумушка барсам ТНТ телеканалында пол жууп, эшик-терезе аарчып, иши кылса тазалаш керек экен. Ал жерде үч күн иштегенден кийин директору чакырып, туруктуу жумушка аларын айтты эле дароо макул болдум.
— Туруктуу иштегенде деле телеканалдын ичин тазалап-жыйнап жүрдүңүз да?
— Ооба, келип эле оператор болуп калды дейсизби (күлүп). Телеканалдын ичинде эки жылга чейин жууп-тазалоочу каражаттарды кармаганым болбосо, камера колума тийген жок. Бирок бул жылдар аралыгында кино тарткан чыгармачыл топ менен таанышып, жакшы мамиле түзө алдым. Кара жумуш жасасам дагы атактуу адамдар менен жүргөнүмө сыймыктанчумун.
— Анан пол жууп жүргөн Эмил оператор болууга кантип жетишти?
— Орто мектепти бүтүп эле Москвага келгем. Жогорку окуу жайга тапшыра албадым. Бирок операторлукка мурунтан кызыгуум бар болчу. Бошоп калсам эле тартуу иштери жүрүп жаткан жерге барып, камераларын көтөрүшүп жардам беримиш болуп, айланчыктап жүрө бердим. Бир күнү оператор болууга кызыгаарымды айтсам, өздөрүнүн тобуна кошуп алып үйрөтө башташты. Кудай бешенеме жазган экен жети жылдан бери оператор болуп келе жатам.
— Учурда кайсы сериалдарды тартып жатасыздар?
— "Универ", "Саша Таня", "Домашний адрес" деген сериалдарды алты оператордон түзүлгөн үч өзүнчө топ тартат. Мен дем алышсыз иштегендиктен ошол үч топко тең кошулуп алгам. Кээде кантип жетишип жатам деп өзүмө таң берип кетем. Иш графиги 9.00дөн 21.00гө чейин созулат. Андан ашып кетсе саатына 750 рублдан кошумча төлөнөт. Алдыңкы маяна алгандардын катарындамын. Суммасы сыр болсун.
— Жети жылдан бери иштеп, биз көргөн киножылдыздар досуңуздай эле болуп калышса керек?
— Алар өздөрүн жылдыз сезбеген, жөнөкөй, шайыр адамдар. Менин улутума, кара жумуш жасаганыма карап мамиле жасашкан жок. Кадимкидей тамашалашып, досундай кабыл алышты. Биринчи келгенде тил билбей бир топ кыйналгам. Анда дагы мени түшүнүүгө аракет кылып үйрөтүшөр эле. Ошолорду көрүп "жөнөкөй болсоң, көп нерсеге жетесиң" деген сөзгө ынанып калдым. Алар биздин беш бармакка көп кызыгышат. Арасында Кыргызстанды көрүп келгендери дагы бар.
— "Кинонун каармандары менен сүйлөшүп берчи, автограф алып, сүрөткө түшүп алайын" деп сурагангандар болобу?
— Андай мүмкүнчүлүктү көп эле дос-тааныштарыма түзүп бердим. Кээ бир ишенбегендерди алып келип актер, актрисалар менен жолуктуруп койчумун.
— Сиздер тарткан сериалдар комедия жанрында болгондуктан тартылуу учурунда кызыктуу окуялар көп болсо керек?
— Ал жерде дагы канчага чейин иштейсиз?
— Эки-үч жылдан кийин Кыргызстанга биротоло кетем. Учурда Өзгөн, Ош шаарларына чакан чайхана ачып жатам. Ал ишке ашып калса бизнес менен алектенип, ага улай эле кино тартып, продюсерликти аркаласам деген пландарым бар.
Жашым 29да, Кара-Кулжа районунун Тоготой айылында туулуп өскөм. Үй-бүлөлүүмүн келинчегим иштебейт, ал мени үйдө тамак-аш, таза кийим-кече менен камсыздап турат.
