Сузак районунун борборунда бешинчи күн сайын боло турган базар райондогу "Достук" эс алуу багынын аймагына көчүрүлгөн
Сатуучулар бул жерге товар жүктөлгөн унаалары менен кирип алгандыктан буга ардагерлер гана эмес, сатуучулар дагы нааразычылыгын билдирип жатышат.
Баткен окуясынын катышуучуларынын Сузак районундагы төрагасы Аскар Рамазанов эс алуу багына коюлган эстеликтер тебелеп-тепселенип жатканын айтты.
"Бул жерге Ата Мекендик согушта, Афган жана Баткен окуяларында каза болгондор үчүн эстелик тургузулган. Эми бул жакта ошолорду тебелеп-тепсеп жатышат. Ушуга уруксат берген чоңдорубузду түшүнгөн жокмун", — деп Рамазанов нааразычылыгын билдирди.
Ал эми сатуучу Азимбек Неманкулов алар үчүн базардын эски орду ыңгайлуу экенин айтып, айласыздан бул жакка келип соода кылып жатканын айтты.
Сузак айыл өкмөтүнүн башчысы Аскарбек Сариев соодагерлер келип алгандыктан убактылуу болсо да "Достук" паркы тараптан соода-сатыгын жасап алсын деп уруксат бергенин айтты.
"Эски базарда бешинчи күн сайын соода болгондуктан машиналар эч бир тарапка өтө албай туруп калчу. Жада калса аянтка чейин чыгып алышты. Баш аламан соода кылууга тыюу салуу боюнча айылдык кеңештин дагы чечими чыккан. Азыр ошонун негизинде тартипке салып жатабыз", — деди ал.
Сариев ошондой эле келерки жумадан баштап "Достук" паркы жакка дагы соода кылууга уруксат берилбей турганын айтты. Сузак районунун аймагында мынча көп кишинин соода кылуусу үчүн жай жок экенин кошумчалап, жума күнү боло турган жайма базарга тыюу салынып жатканын баса белгиледи.
