БИШКЕК, 17-дек. — Sputnik. Улуттук банктын алтын запасынын наркы 1-декабрга карата 11 миллиард 910,2 миллион сомду түзгөнүн аталган мекеме билдирди.
Кыргызстандын эл аралык валюта резерви ондон ашуун өлкөнүн валютасынан жана алтындан турат. Резерв эл аралык эсеп-кысап жана төлөмдөр, төлөм балансынын таңкыстыгын жоюу жана улуттук валютанын курсун турукташтыруу үчүн пайдаланылат.
Жыл башына салыштырмалуу алтындын запасы 10 миллиард 932,2 миллион сомдон 11 миллиард 910,2 миллион сомго чейин жетип, 11 айдын ичинде запас 978 миллион сомго өскөн.
Лондон биржасынын маалыматы боюнча учурда алтындын бир унциясы 134,5 долларга жогорулап, 1 181 долларды түздү. Бирок буга карабастан америкалык валюта сомго салыштырмалуу 6,7 сомго арзандап, 69,15 сомго бааланууда.
