БИШКЕК, 19-дек. — Sputnik. Көпчүлүккө орустардын "Кухня" сериялындагы Айнуранын ролунан кийин таанылган кыргыз актрисасы Жаңыл Асанбекова француз режиссеру Гийом Проценконун "Разбуди меня" тасмасында баңги бизнеси менен алектенген аялдын ролун жаратты. Бул тууралуу актриса Sputnik Кыргызстан агенттигинин кабарчысына билдирди.
Анын айтымында, тасманын негизги темасы — баңги бизнеси жана миграция.
"Тасма Россияда тартылды. Негизги мазмуну — бул баңги бизнесине билип жана билбей аралашып калган адамдардын тагдыры. Көңүл калуу, муң, пикир келишпестик жана албетте, сүйүү. Аны менен бирге Борбор Азиядан келген мигранттардын жашоосу. Мен Азия өлкөлөрүнүн биринен келген, баңги зат ташып сатуу менен алектенген аялдын образын жаратам. Тасманын тартылышына чоң салым кошкондордун бири Татьяна Петрик дагы биздин мекендешибиз. Өзү кара-балталык. Россияга келип, кино жаатына аралашканына көп болуптур", — деди Асанбекова.
Жаңыл Асанбекова "Кухня" тасмасынан кийин аты чыгып, кийин "Вместе навсегда" (Украина), "Анжелика", "Срочно выйду замуж" сыяктуу бир катар тасмаларга тартылган.
