Дем алыш күндөрү катуу кар жаашы мүмкүн

БИШКЕК, 22-дек. — Sputnik. Кыргызстандын дээрлик бардык аймактарында кар жаай турганын Кыргызгидромет билдирди.

Маалыматка ылайык, жолдор тайгак жана тоңголок болуп, тоолуу аймактарда кар күрткүсү күтүлөт. Батыштан соккон шамалдын ылдамдыгы секундасына 4-9 метрден, айрым жерлерде 15-20 метрге жетиши мүмкүн.

Кыргызгидромет ошондой эле 22-декабрдан 24-декабрга чейин мезгил-мезгили менен кар жаап, 23-24-декабрда айрым жерлерде катуу жаашы мүмкүндүгүн эскертет.

23-декабрдан 25-декабрга чейин абанын температурасы Чүй, Талас, Ош, Жалал-Абад, Баткен облустарынын дыйканчылык аймактарында жана Ысык-Көл ойдуңунун чыгышында түнкүсүн 10…15 градус суук, күндүз 4…9 градуска чейин суук болот. Ал эми Нарын облусунун дыйканчылык аймактарында жана тоолуу райондордо түнкүсүн 20…25 градус суук, күндүз 10…15 градуска чейин суук болот. Бийик тоолуу райондордо түнкүсүн —25…30 градуска чейин суук болору болжолдонууда.

Мындай туруксуз аба ырайы автоунаа, энергетика жана коммуналдык кызматтардын ишин жана кышкы жайыттарда малды кармоону кыйындатарын Кыргызгидромет эскертет.