Эл аралык "Рампорт Аэро" авиация холдингинин өкүлү Галина Тельпиз жаңы каттам жүргүнчүлөр арасында жакшы кабыл алынарын айтты.
"Биздин иликтөөлөргө караганда Россияда жүргөн Кыргызстандын көп атуулдары Люберцы, Котельники аймактарында жашагандыктан, алар негизинен "Жуковский" аркылуу учат деген ниеттебиз. Мындан сырткары, аталган жерден аба майданга автотранспорт менен жетүү алда канча арзанга түшөт", — деди Тельпиз.
Ал "Жуковскийге" метро жана электричка менен жетсе болорун кошумчалады.
"Кыргызстандыктар метро менен Котельник станциясына чейин жетип, андан ары "Жуковскийге" чейин шаттл-бас менен 40 мүнөттө жетет. Билеттин баасы болгону 79 рубль, ал жакта Москвадагы жүргүнчү билеттерин колдонсо да болот. Автобус жаңы, жылуу, жүк кенен батат. Майыптардын катташы үчүн да ыңгайлуу", — деди менеджер.
Электричка менен Казань вокзалынан акыркы станцияга чейин барып, "Жуковскийге" такси менен андан ары жетип алыш үчүн 10 мүнөткө жакын убакыт кетет деп түшүндүрдү ал.
Учак билетин эки тарапка 140 долларга (10 000 сомго чукул) интернет аркылуу да сатып алса болот.
