БИШКЕК, 4-янв. — Sputnik. Каракол шаарындагы стадионго быйыл мейманканасы бар эки чоң жана эки кичине футбол аянтчасы салынарын өкмөттүн Ысык-Көл облусундагы ыйгарымдуу өкүлчүлүгүнүн маалымат кызматы билдирди.
Ага ылайык, Асхат Акибаев КР Футбол федерациясынын президенти Семетей Султанов менен жолугуп, спортту өнүктүрүү үчүн комплекстүү чараларды көрүү керектигин баса белгиледи.
"Спорттун бир түрү алдыга жылып, экинчиси калып калбашы керек. Бул стадион союз учурунда спортчулардын тоо шартына машыгуусу үчүн салынган. Андыктан аны толук кандуу пайдаланышыбыз керек", — деди ал.
Өз кезегинде Султанов жергиликтүү өзүн-өзү башкаруу органдарынын жетекчилиги алдында футбол командаларын түзүү керектигин белгиледи. Облус жетекчиси бул жакшы сунуш экенин айтып, аны каржылоо жагын мэр, акимдер менен талкуулоо керектигин кошумчалады.
Каракол шаарындагы стадиондун аянты беш гектардан ашык. Анын жанындагы 25 кишиге ылайыкташтырылган мейманкана 60-70-жылдары курулган.
