Дача айылындагы кулаган учактан көчөгө аккан авиакеросини боюнча ӨКМдин адистери да иштеп жатат. Бул тууралуу министр Кубатбек Боронов Sputnik Кыргызстан агенттигине билдирди.
Анын айтымында, учурда жергиликтүү тургундар авиакеросинден ууландык деп ооруканага кайрылып жаткандыктан, ал жерлерди ӨКМ кызматкерлери да текшерүүдө.
"Жергиликтүү тургундар кырсык болгон учурда учактын майы айылдын эки көчөсүнө акканын айтышкан. Бир жума өткөн соң алар ууландык деп ооруканага кайрыла баштады. Бирок Саламаттык сактоо министрлигинин кызматкерлери ал жакка барып суусунан бери текшерип, анализи жакшы эле натыйжа көрсөттү деп жатышат. Аталган аймакта биздин кызматкерлер да иштөөдө. Эгер ден-соолукка коркунуч жарата турган нерселер аныкталса, дароо жардам берүүгө даярбыз", — деди Боронов.
Ошондой эле ӨКМ министри учак кырсыгынан жапа чеккен турак үйлөрдүн чатырын калыбына келтирүү максатында шиферлер жеткирилип жатканын кошумчалады.
