БИШКЕК, 25-янв. — Sputnik. Sputnik. Жума намаз күндөрү милиция кызматкерлери мечиттерди көзөмөлгө алат. Бул тууралуу Sputnik Кыргызстан агенттигине ИИМдин маалымат кызматынын өкүлү Эрнис Осмонбаев билдирди.
Ага ылайык, бул кадам ар кандай терс көрүнүштөрдүн алдын алуу максатында жасалууда.
"Аймактык милиция кызматкерлери жума күндөрү намаз учурунда тартипти көзөмөлгө алат. Бул кадам акыркы күндөрдөгү мечиттеги уурулуктун көбөйүшүнөн улам жана коомдук тартипти сактоо максатында жасалууда. Мындан сырткары, терс үгүт жүргүзгөндөр милиция кызматкерлерин көргөндө жалтанып турары бышык", — деди Осмонбаев.
Ал милиция кызматкерлери намаз учурунда гана мечитте болоорун, калган учурда ишин улантарын кошумчалады.
"Дин, укук жана саясат" көз карандысыз аналитикалык борборунун директору, теолог Кадыр Маликов бул кадам туура деген ойдо.
Ал мындан сырткары башка маанилүү маселе бар экендигине токтолду.
"Акыркы учурда социалдык тармактарда намаз окугандарга, мечиттерге байланыштуу кайым айтышуулар көбөйүп баратат. Ал жерде намаз окугандар менен окубагандар эки тарап болуп бөлүнүүгө чейин барууда. Бул көрүнүш эртең көчөгө чыгышы мүмкүн. Ошондуктан интернет патруль жүргүзүү зарыл. Болбосо өтө кооптуу жагдай жаралды", — деди Маликов.
Президентке караштуу дин иштери боюнча мамлекеттик комиссиясынын талдоо бөлүмүнүн башкы адиси Замир Турсунбеков ар бир жарандын дин тутуу эркиндиги бар экенине токтолду.
"Бизде дин тутуу эркиндиги бар да. Ар бир жарандан шектене берген туура эмес го. Рейд учурунда болсо бир жөн. Ар бир мечиттерге бирден милиция коюнун зарылчылыгы деле жок. Анткени мечитке келгендерди аймактарда бири-бирин тааныйт", — деди Турсунбеков.
Муфтийдин орун басары Акимжан ажы Эргешов милиция кызматкерлери бекер убактысын кетирет деген ойдо.
"Мусулман коомчулугу үчүн бул зарыл маселе эмес. Бир гана Бишкек шаарында жолдогу тыгынды көзөмөлгө алган Кайгуул милициясы болсо жакшы. Ал эми милициянын кереги жок. Жалгыз милиция 1000ге чукул адамдын арасында эмне кыла алат? Ары түртүлүп, бери түртүлүп, анан кетет. Профилактика мындай жол менен эмес, агартуу, окутуу жолу менен болгону дурус", — деди Эргешов.
Дин аалымы Чубак ажы Жалилов маселенин эки тарабы бар экенин билдирди.
"Маселенин эки тарабы бар. Биринчиден, коопсуздукту сактоого жакшы. Камераларды күчөтүп, тартипти караганы туура. Экинчи тарабы — ууру милицияны каратып уурдабайт да. Чыгып бара жатканда байкатпай кийип кетип калат. Аны милиция кантип карайт? Бомба жардырат десе, анда атайын жабдуулар менен текшериши керек. Жөн гана форма кийип тургандан маселе чечилип деле кетпейт", — деди Жалилов.
Белгилей кетсек, Кыргызстан мусулмандарынын дин башкармалыгы молдолор жана милиция кызматкерлери менен биргеликте ар кыл тренинг, семинарларды өткөрүп келет. Акыркы ирет Ош мамлекеттик университетинин теология факультети тарабынан Баткен облусунун имамдары семинардан өтүшкөн.
