БИШКЕК, 1-фев. — Sputnik. Бишкек ШИИБдин кызматкерлери Чүй проспекти менен Логвиненко көчөлөрүнүн кесилишиндеги үйдө тартылган белуха китинин сүрөтү боюнча териштирүү баштады. Бул тууралуу аталган мекемеден билдирди.
Ага ылайык, милиция кызматкерлери аталган жерге барып, ким тарткандыгын сураштырган.
"Милиция кызматкерлери учурда аталган сүрөттүн социалдык тармакта жүрүп жаткан "Синий кит" оюнуна тиешеси бар жогун текшерүүдө. Авторлор милицияга чакырылып, сүрөт эмнени түшүндүрөөрүн, ким уруксат бергендигин айтып беришет", — деп айтылат маалыматта.
Буга чейин кыргызстандык өспүрүмдөр социалдык тармактар аркылуу "морекитов", "тихий дом", явигре" жана "разбудименяв420" хэштегдери менен бөлүшө баштаганы айтылган. Ал эми Россиянын укук коргоо органдары өспүрүмдөрдүн өз өмүрүнө кол салып жатышына аталган хэштегдердин тиешеси бар экенин божомолдоп жатат.
