Нарын районуна караштуу Жалгыз-Терек айылындагы окуучулар жаңы мектеп салынганга чейин бир кабаттуу эски мектепте үч сменде билим алышчу. Бул тууралуу аталган мектептин жетекчиси Алмазбек Сейитказиев билдирди.
Анын айтымында, айылга эки кабаттуу жаңы мектеп салынып, окуучулардын бир сменде окуусуна жол ачылды.
"Рысбек Усубалиев атындагы орто мектепте жалпысынан 234 окуучу билим алат. Буга чейин эски мектепте үч сменде окуп келсек, эми жаңы мектеп курулуп балдар бир маал эле окумай болду. Түштөн кийин башка усулдук, сабактан тышкаркы окуу-тарбиялык иштер менен алектенишет. Балдар эски мектепте окуп жүргөндө да билим жагынан жалпы республикалык тестирлөөдө жакшы көрсөткүчтөрдү көрсөткөн, облустук, республикалык олимпиадаларга катышып келген", — деди мектеп жетекчиси.
Директордун айтымында, билим берүү жайынын курулушуна жалпысынан 47,5 миллион сом акча сарпталган.
