БИШКЕК, 6-фев. — Sputnik. Россиялык белгилүү аткаруучу Тимур Юнусов (Тимати) Казакстандын Петропавловск шаарындагы айып короодо 10 жылдан ашуун убакыттан бери турган спорттун унаасын сатмай болгонун Sputnik Казахстан билдирди.
Тиматинин Audi TT Coupe үлгүсүндөгү машинасын ырчы 2005-жылы гастролго келген маалда үйүнүн алдынан уурдатып жиберген. Полиция унааны бир жылдан кийин Казакстандан таап берген. Машина бир нече ирет колдон колго өтүп келгени аныкталган. Унаанын табылышы боюнча бир нече ирет кабардар болсо да Тимати аны алып кетүүгө ашыккан эмес.
Ырчы өзүнүн Instagram баракчасына уурдалган унаанын айланасындагы уу-дуу кепти басыш үчүн билдирүү жазды.
"Менин эч кимге эч кандай дооматым жок. Унаадан баш тартканымды тастыктап тийиштүү документтин баарына кол коюуга даярмын. Петропавловск шаарындагы айып короонун жетекчисине машинаны сатып, каражатты калаадагы балдар үйүнө жумшап коюшун өтүнөм", — деп билдирген ал.
Айып короонун кызматкерлеринин айтымында, унааны сатып алууну каалагандар көп болгону менен Тимати анын мыйзамдуу ээси катары бойдон калды.
Тиматиге чейин бул айып короодо россиялык саясатчы Владимир Жириновскийдин да унаасы турганын, аздан соң аны ээси кайрадан Москвага алып кеткени белгилүү.
