БИШКЕК, 17-фев. — Sputnik. Бельгиялык археолог, Брюсселдин Эркин университетинин ардактуу профессору, Археология боюнча королдук академиянын мүчөсү Жан Бланкофф Чыңгыз Айтматовдун чыгармачылыгы тууралуу материалдарды Кыргызстанга берди. Бул салтанатка Бельгияда иш сапары менен жүргөн өлкө башчысы Алмазбек Атамбаев катышканын президенттин маалымат кызматы билдирди.
Атамбаев өз сөзүндө бул кечеге улуу жазуучуну жакшы тааныгандар катышып жатканын баса белгилеп, Айтматов бир гана кыргыздын эмес, дүйнө элинин жазуучусу экенин айтты.
"Биздин эл Чыңгыз Айтматовдой улуу жазуучуну тапканына абдан кубанам жана сыймыктанам. Анын чыгармалары дүйнөгө жайылды. Ар бир чыгармасы өзүнчө адап-ахлактык сабак. Айрымдарынын маани-маңызы убакыттын өтүшү менен билинет", — деди президент.
Президент сөзүнүн аягында Бланкоффго символикалуу боз үй белек кылды.
