БИШКЕК, 19-фев. — Sputnik. Чоң-Алай районунун Жаш-Тилек айылында кар көчкү алдында калган тургундар ооруканага жеткирилип, дарылана баштаганын Саламаттык сактоо министрлиги билдирди.
Маалыматка ылайык, ооруканага 11 адам жеткирилип, бирөө жатып дарылануудан баш тарткан.
"Ушул тапта эки жабырлануучунун акыбалы оор, калганыкы канааттандырарлык. Жабыркагандардын ичинен эки адамдын мээси чайкалып, башынан жаракат алган. Үч адамдын бут тарамыштары чоюлуп, тизелери ооруп калган. Көпчүлүгү шок абалында", — деп айтылат билдирүүдө.
Учурда Жаш-Тилек айылында хирург, травматолог жана фельдшерден турган топ нөөмөттө турат.
Эске салсак, бүгүн таңга маал Ош облусунун Чоң-Алай районундагы Жаш-Тилек айылында түшкөн кар көчкүнүн алдында калган 11 жаран аман калып, эки жаш бала каза тапкан.
