БИШКЕК, 20-фев. — Sputnik. Ош облусунун Чоң-Алай районундагы Жаш-Тилек айылында кечээ, 19-февралдын таңында жүргөн кар көчкү алдында калган 11 жаран аман калып, эки жаш бала каза тапкан. Табигый кырсыктын күбөсү Sputnik Кыргызстан агенттигине кар алдында калгандарды эл кантип куткарганын айтып берди.
Эки баласын калкалап, экөөнү алып чыга албай калган эне
Жаш-Тилек айылынын башчысы Түмөнбай Каримбеков кырсык болор замат 200дөй киши чогулуп, куткарууга киришкенин билдирди.
"Кырсык тууралуу таңга маал саат 5.30да уктум. Барсам, кар тоодой болуп үйүлүп, үйлөрдүн чатырынын чекелери гана чыгып туруптур. Эл чогула калып, күрөк менен карды казып, үйдүн ичинде калып калгандарды куткарууга жан үрөй баштадык. Бизге келчү унаа жолдор да тосулуп, куткаруучулар жол тазалагандан кийин келишти. Ага чейин 3-4 саат өтүп, кар алдында калгандарды эл өзү алып чыгып койду", — деди Каримбеков.
— Үй ээси бир иниси менен балдарды алып чыгууга аракет кылып жатканда көчкү басып, алар сыртта калып калган. Артында келаткан аялы эки баласын босогонун жанында калкалап калыптыр. Аркы бөлмөдө уктап жаткан эки баласын алып чыгууга жетишпей калып, алар ошол жерде эле жан беришкен экен", — деди айыл башчы.
Каримбеков айыл эки тоонун ортосунда жайгашканын, бирок аксакалдар буга чейин мындай көчкү түшпөгүн айтып жатышканын кошумчалады.
Дубалдын ачылып калган жеринен чыгып аман калгандар
Көчкү баскан экинчи үй-бүлөнүн мүчөлөрү аман калды. Маалыматка ылайык, көчкү үч мал сарайдын үстүнө түшүп ичиндеги малдын баары өлгөн. Ал жерде болжолдуу түрдө 20 бодо, 50дөн ашуун кой-эчки болгон.
Кар алдында калган үйдө жашаган Таалайбек Койлубаев менен байланышканыбызда үй-бүлөсү менен ооруканадан чыгып, айылына баратканын билдирди.
Анын айтымында, балдарынын бири төрт, бири эки жашта, ал эми кичүүсү төрт айлык наристе. Ымыркайды жаткан жеринен бешиги менен алып чыгышкан. Койлубаевдердин да үйү менен сарайы жараксыз болуп калды.
"Ден соолугубуз жакшы, кечээтен бери дарыгердин көзөмөлүндө болдук. Азыр үй-бүлөбүз менен ооруканадан чыгып айылга жөнөп атабыз. Эми барганда өкмөт мобилдүү үй алып келген дейт, ошондо же коңшубуздун үйүндө жашап турабыз да", — деди жабырлануучу.
Материалдык жардам көрсөтүлдү
Ал эми өкмөттүн Оштогу өкүлү Таалай Сарыбашов кырсык болгон жерге барып, каза болгон бөбөктөрдүн жакындарына жолугуп көңүл айтып, үй-бүлөгө материалдык жардам көрсөткөндүгүн облус жетекчилигинин маалымат кызматынан билдирди.
Ал эми Өзгөчө кырдаалдар министрлиги Чоң-Алай аймагындагы кар көчкү коркунучу бар жерлерде кар атып түшүрүү иштерин жергиликтүү бийлик менен биргелешип жасап жатат.
