БИШКЕК, 21-фев. — Sputnik. Табарсыгы сыртына чыгып төрөлгөн наристеге Эне жана баланы коргоо улуттук борборунун дарыгерлери операцияны туура жасагандыгын №3 балдар ооруканасынын башкы дарыгери Талант Өмүрбеков Sputnik Кыргызстан агенттигине билдирди.
Эске салсак, операция жасалган жери ажырап кетип, акыбалы начарлаган бир айлык Жантай кечээ балдар ооруканасына жаткырылган.
"Бир айлык ымыркай кечээ биздин ооруканага оор абалда түштү. Алгачкы текшерүүлөр учурунда балага операция туура жасалганын көрдүм. Бирок ушул сыяктуу операциялардын 70 пайызында оорулуунун абалы операциядан кийин оорлошуп кетиши толук мүмкүн. Ошол себептен тигил же бул күнөөлүү деп мен айта албайм", — деди Өмүрбеков.
"Текшерүү учурунда табарсык жана жыныс органдарына байланыштуу төрт кемтиги бар экени белгилүү болду. Биз алардын баарын операция жолу менен ордуна келтирип, дарылап берүүгө дараметибиз жетет. Бирок операциялар этап-этабы менен жасалат. Буга убакыт керек", — деди башкы дарыгер.
Маалыматка караганда, профессор Талант Өмүрбеков жетекчилик кылган медициналык тез жардам клиникалык балдар ооруканасында акыркы жылдары балдардын жыныс органдарындагы кемтиктерди четтетүү боюнча 400дөн ашуун операция жасалган.
