БИШКЕК, 2-мар. — Sputnik. "Город 312" тобунун солисти Айя (Светлана Назаренко) "Ты супер" долбоорунун катышуучусу Урмат Мырсакановго добуш берүүгө чакырды.
12 жаштагы Урмат Мырсаканов 4-мартта НТВ телеканалы аркылуу талантын тартуулайт.
Белгилүү аткаруучу Урматка жеңиш тилеп, ага карата колдоо сөзүн айтты.
"Ишемби күнү биздин Кыргызстандын намысын коргой турган Урматты жеке мен жана жалпы "Город 312" тобу жан үрөп колдойбуз. Мекенинен алыс жакта жүргөн адамга колдоо канчалык керек экенин элестете да албайсыздар", — деди Назаренко.
Ырчы кичинекей катышуучуну колдоп, башкаларды ага добуш берүүгө чакырды.
"Сиз Sputnik Кыргызстан агенттигинин сайтына кирип "издөө" деген жерден Урмат Мырсакановду таап добуш берсеңиздер болот. Биздин эл чындыгында мыкты экенин билесиздер. Келгиле, жердешибизге добуш берели", — деди ырчы.
Эл аралык музыкалык шоуга 92 бала катышып жатат. Урмат Мырсаканов — балдар үйүнүн тарбиялануучусу, Кыргызстандын атынан катышкан жалгыз өнөрпоз. Урматтын сахнага чыкканын 4-март күнү көрүүгө болот.
"Ты супер!" конкурсу НТВ жана Sputnik эл аралык маалымат агенттиги тарабынан демилгеленип, Россиянын Билим берүү жана илим министрлигинин колдоосу менен уюштурулган.
Музыка жаатында таланттуу балдар КМШ жана Балтика боюндагы мамлекеттеринен келишет. Алардын катарында Кыргызстан, Армения, Белоруссия, Грузия, Молдова, Казакстан жана Эстония бар.
