Жырткыч айылга түшүп, жашоочулардын короосуна чейин кирип келип атканын Тоң районунун тургуну Шаршенбек Абакиров Sputnik Кыргызстан агенттигине билдирди.
Эскерте кетсек, Тоң районун Калкагар айылына таңга жуук карышкыр бир нече үй-бүлөнүн малына тийип, 40ка чукул кой-эчки менен 10го чукул бодо малды тиштеп салган. Текшерүү карышкырдын кутурма менен ооруй турганы аныкталган.
"Ошол күнү таңга маал сарайдагы мал чуру-чуу түшүп калды. Карайын деп баратсам, уулум бөлмөсүнөн чыгып, мен карап келейин деди. Бир маалда анын "ата" деген үнү угулду. Короого барсам, балам карышкыр менен кармашып атыптыр. Карышкыр колу-бутун тиштеп салыптыр. Экөөлөп муунтуп өлтүрдүк", — деди Абакиров.
Маалыматка караганда, учурда жабырлануучунун абалы жакшы. Ал Балыкчы шаардык ооруканасына барып, дарылануудан өтүп жатат.
