БИШКЕК, 9-мар. — Sputnik. Бир аз мурда Борбордук шайлоо комитети Жогорку соттун имаратынан "Айыл Банктын" имаратына көчөөрү айтылган. Бүгүн бул маалыматты Sputnik Кыргызстан агенттигине БШКнын маалымат кызматынан ырасташты.
Анда айтылгандай, БШК 20-мартта дарегин алмаштырат.
"Алдын ала маалыматтар боюнча штатты кеңейтүү жана шарттарды жакшыртуу максатында "Айыл банк" жайгашкан имаратка көчүү пландалып жатат. Учурда БШК Жогорку соттун имаратында жайгашкан. Эми имарат соттун өзүнө керек болуп жатыптыр", — деп БШК маалымат кызматынан кабарлашты.
Коомчулукта алдыда келе жаткан президенттик шайлоого карата БШКдагы серверлер бекем сакталышы керектиги, буга байланыштуу азырынча көчүүгө мүмкүн эместигин айткандар болбой койгон жок.
Ал эми БШКнын маалымат кызматы көчүү шайлоого эч кандай таасир тийгизбей турганын билдирди.
"Бул жерде бир гана борбордук серверди көчүрүү убакытты талап кылышы мүмкүн. Калган жагынан эч маселе жаралбайт", — деп маалымат кызматынан билдиришти.
БШК сыяктуу мамлекеттик ири мекемелердин маалыматтары топтолгон борбордук серверди көчүрүү техникалык жактан канчалык татаал жана канча убакыт талап кыларын билүү үчүн Sputnik Кыргызстан агенттиги IT-адис Михаил Дудинге кайрылды.
Анын айтымына караганда, серверди башка жакка көчүрүү үчүн атайын адистер чакырылып, техниканы орното турган жер толугу менен даяр болушу керек.
"Жеткирилген жабдууларды кайра тууралап чыгышка бир канча ай талап кылынышы мүмкүн, ал техниканын өзүнөн көз каранды. Бул техникалык гана жагы. Ал эми биздеги мамлекеттик органдардагы бюрократиялык жагдайларды эске алганда, иш мындан дагы көпкө созулуп кетиши мүмкүн. Анткени мамлекеттик маанидеги мекемени көчүрүүдө керектүү документке бир адамдын колу коюлбай калса, иш токтоп калышы мүмүн", — деди Дудин.
Ал ошондой эле борбордук серверди көчүрүүдө биринчи орунда маалымат коопсуздугу тургандыктан, өзгөчө кылдаттуулук керектигин кошумчалады.
