БИШКЕК, 12-мар. — Sputnik. Бишкекте Кайгуул милициясынын эки кызматкерин жана алар менен жүргөн журналист Темирлан Сейитбек уулун топ адамдар сабап кеткен. Бул тууралуу Sputnik Кыргызстан агенттигине КТРКнын "Маалымат" студиясынын шеф-редактору Бактияр Тукеев билдирди.
Анын айтымында, журналист Темирлан Сейитбек уулу 10-марттан 11не караган түнү Кайгуул милициясы жүргүзгөн рейдди чагылдыруу үчүн чыккан.
"Түнкү саат 1.30дарда катуу ылдамдыкта келаткан "Жигули" ВАЗ 2106" үлгүсүндөгү унааны тоскондо, токтобой кетип калган. Кайгуул милициясынын эки кызматкери менен биздин журналист анын артынан түшкөн. Натыйжада Орок айылынын кире беришиндеги көрүстөндүн жанынан унааны токтотушкан. Айдоочусу мас абалында болуп, жанында бир аял менен эркек киши отурган. Айдоочу милицияга баш ийбей, каршылык көрсөтө баштаган. Ошол учурда ары жактагы үйлөрдөн 5-6 бала чыгып биздин кабарчы менен тартип сакчыларына кол салган", — деди Тукеев.
Ал белгилегендей, балдардын бирөөсү журналистти таяк менен башка чаап, камерасын талкалап салган. Болжол боюнча кол салгандардын курагы 25-30 чамасында.
Ошондой эле ал кол көтөргөн жарандардын экөө кармалып, калгандары из жашырып кеткенин билдирди. Ал эми журналисттин денесине залал келтирилип, мээси чайкалган. Учурда ал ооруканада экенин кошумчалады.
Бул боюнча Ленин РИИБи кылмыш иши козголуп, издөө иштери жүрүп жатканын билдирди.
