"Апрель революциясынын баатырлары" деген атты тоо чокусуна ыйгаруу алты жыл мурда демилгеленген. Бул тууралуу Sputnik Кыргызстан агенттигине Ак-Суу районунун Челпек айыл өкмөтүнүн башчысы Эрлан Жыргалов билдирди.
Эске сала кетсек, чокуга ат ыйгаруу боюнча мыйзам долбоор коомдук талкууга коюлган.
Маалыматка караганда, мындай аталышты Ысык-Көл облусунун Ак-Суу районунун аймагындагы Тескей Ала-Тоо кыркасында жайгашкан 4142,2 метр бийиктиктеги чокуга берүү сунушталууда.
Демилге Ак-Суу районунун Челпек айылдык кеңешинин чечими боюнча көтөрүлүп, райондун администрациясы токтомду кабыл алган.
"Демилге 2011-жылы эле көтөрүлгөн. Бирок сөз бойдон калып калган. Кийин элден кайрадан сунуш түшүп, жергиликтүү кеңештин депутаттары аны колдошту. Карап көрсөк өлкөнүн бир да жерине Апрель баатырларынын аты коюлбаптыр", — деди Жыргалов.
Айыл өкмөт башчысы учурда тоо кыркага жаңы ат коюлган белгини даярдап коюшканын кошумчалады.
