БИШКЕК, 15-мар. — Sputnik. Милициянын кашын жара тепкен ырчы Алтынай Жайнакова рулга мас абалында отурганы үчүн кошумча 20 миң сом айып салынганын Ош облустук сотунун маалымат катчысы Бекзат Осмонкулов билдирди.
Сот отуруму 13-мартта өтүп, ырчы бийлик өкүлүнө карата күч колдонгондугу үчүн 30 миң сом айыпка жыгылган.
"Жайнакова милиция кызматкеринин кашын жара тепкендиги үчүн 30 миң сом айыпка жыгылса, рулга мас абалында отурганы үчүн 20 миң сом кошумча айып салынды. Өкүм акыркы чечим эмес, нааразы тарап аппеляциялык тартипте даттанууга укуктуу", — деди Осмонкулов.
Айдоочу Алтынай Нематилла кызы убактылуу камакка алынып, 14-январда Ош шаардык соту аны үй камагына чыгарган. Буга чейин ырчы кызга Кылмыш жаза кодексинин 234-беренесинин 3-бөлүмү (бийлик өкүлүнө каршылык көрсөтүү, бейбаштык) менен иш козголгону маалымдалган болчу.
