БИШКЕК, 15-мар. — Sputnik. Жалал-Абад шаарынын ооруканасына Россия өкмөтүнөн мобилдик клиника тапшырылганын Саламакттык сактоо министрлиги билдирди.
"КамАЗ" унаасынын платформасында жабдылган комплекс тоолуу шартка ылайыкташып, ысык-суукка жарамдуу келет. Электр энергиясы менен иштеп, талаа жеринде да калыбынан жазбай өз функциясын аткара алат.
"Мобилдүү клиника үч кабинеттен турат, анда ар кандай анализдерди чыгаруучу лаборатория, гинекологиялык бөлмө жана УЗИ, кардиограф аппаратары, офтальмолог жана отоларингологдор үчүн тиийштүү жабдуу менен жабдылган терапевттин кабинети бар", — деп айтылат маалыматта.
Клиника Россия өкмөтү тарабынан каржыланган программанын алкагында берилүүдө. Буга чейин мындай клиника Чүй, Ысык-Көл жана Ош облустарына жеткирилген. Бардык кызматтар акысыз көрсөтүлөт.
