БИШКЕК, 27-мар. — Sputnik. Жаңы муфтийдин шайлоосуна үч талапкер — азыркы муфтий Максат Токтомушев, Чубак Жалилов жана Ниязалы Арипов катталды. Бул туурасында Аалымдар кеңешинин төрагасынын орун басары Марс Ибраев Sputnik Кыргызстан агенттигине айтып берди.
Муфтийди шайлоо 4-апрелге коюлган. Ага чейин атайын комиссия конкурс уюштуруп, муфтий болом дегендердин потенциалын сынап көрөт.
"29-30-апрелде атайын конкурс өтөт. Комиссия үчөөнүн теологиялык багыттагы илим-билим деңгээлин, Баш мыйзамды канчалык деңгээлде билерин, муфтий катары келечектеги иш-пландары, программасы кандай экендигин сынайт", — деди Ибраев.
Аалымдар кеңешинин төрага орун басары талапкерлерди өздөрүнөн сырткары жамааттар да көрсөткөнүн кошумчалады.
Муфтийлердин билимин текешерип, анын татыктуу талапкер экендигин аныктай турган комиссия тогуз адамдан турат. Курамына КРдин Аалымдар кеңешинен алты, Дин иштери боюнча мамлекеттик комиссиядан эки жана Улуттук коопсуздук боюнча кызматтан бир өкүл кирген.
Кыргызстан мусулмандар дин башкармалыгынын жетекчилиги — өлкөнүн муфтийлигине шайлоого катышуу үчүн талапкерлердин арызын кабыл алуу мындан бир топ күн мурда аяктаган.
