БИШКЕК, 30-мар. — Sputnik. Балыкчы шаарында "Оберон" ЖЧКсынын жер-жемиш сактаган ири логистикалык борбору ачылды. Бул тууралуу Кыргыз-орус өнүктүрүү фондунун маалымат кызматы билдирди.
Аталган долбоорду эки коммерциялык банк каржылап, аны салууга 4 миллион 450 миң доллар жумшалган.
Насыя акысына имарат курулуп, кампага 2400 тонна жемиш бата турган муздаткыч өңдүү керектүү жабдуулар сатып алынган.
ULO системасы жер-жемиштердин сапатын кетирбей 270 күнгө чейин сактап тура алат. Мындай технология жемиштерди чет өлкөгө импорттого мүмкүнчүлүк түзүп берет.
"Аталган кампанын Ысык-Көл облусуна курулганынын себеби бул облустагы алма, алмуруттар даамы, сапаты жана экологиялык жактан табигыйлыгы менен айырмаланып турат. Өнөр жай муздаткычтарын жеткирүү жана монтаждоо келишими Россия–Германиянын Plattenhardt + Wirth GmbH компаниясы менен түзүлгөн. Жабдык евростандартка туура келет", — деп түшүндүрдү аталган фонд.
18 ай ичинде Кыргыз-орус өнүктүрүү фонду 213 миллион долларга 682 долбоорду каржылаган.
