Кан тамырлары кесилип ооруканага түшкөн Садыр Жапаров үн катты

Жаза аткаруу мамелкеттик кызматы №47 түзөтүү колониясынын ооруканасында жаткан экс-депутат Садыр Жапаровдун абалы тууралуу маалымат таратты.

Эскерте кетсек, №1 тергөө абагында кармалып турган Жапаров 2-апрель күнү кан тамырлары менен кекиртеги кесилип, ооруканага түшкөн.

Маалыматта Жапаровдун ден соолугу жакшы экенин, аны эки күзөтчү кайтарып жүргөнү айтылат.

"Саламаттыгым жакшы. Мага камтама болбогула. ЖАМК кызматкерлерине эч кандай доом жок. Мындай кадамга эмнеге барганымды билбейм, шок абалында болчумун. Бычакты алып өзүмдү сайгылап салдым. Андан кийин эле ооруканадан ойгондум", — деген экс-депутаттын сөзүн видео жазылмадан угууга болот.

Белгилей кетсек, 25-март күнү чет жакта жүргөн Садыр Жапаровду чек арадан УКМК кызматкерлери кармап кеткен. Ошол эле күнү анын тарапташтары митингге чыгып, анын жүрүшүндө милиция менен кагыша кеткен акциянын катышуучулары камалып, айрымдары кийин кое берилген.

Жапаровго Кылмыш жаза кодексинин 30, 227, 341, 113 жана 234-беренелери (барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча айып тагылууда.

Сот Жапаровдун тергөө бүтмөйүнчө Бишкек шаарындагы №1 убактылуу кармоо жайына калуусун чечкен.