БИШКЕК, 5-апр. — Sputnik. 7-апрель күнү "Ала-Тоо" аянтында Апрель революциясына арналган иш-чара өтөрүн өлкө башчынын маалымат кызматы билдирди.
Бул күн жыл сайын белгиленүүчү мамлекеттик деңгээлдеги майрам катары эс алуу күнү болуп эсептелинет. Мындан улам өлкө жетекчилиги, 2010-жылы 7-апрелде каза болгон жарандардын жакындары, жарадар болгондор "Ата-Бейит" мемориалдык комплексинен курман болгондорду эскеришет.
"Саат 13.00дө "Ала-Тоо" аянтында Бишкекте Апрель окуяларына арналган иш-чара тартууланып, аягында Кыргызстандын алдыңкы өнөрпоздору катышкан концерт сунушталат", — деп айтылат маалыматта.
Мындан тышкары, Бишкектин борборунда ар кандай маданий иш-чаралар өтүп, бул күн майрамдык салют менен жыйынтыкталат. 7-апрель Ош шаарында жана облус менен район борборлорунда да белгиленет.
