БИШКЕК, 5-апр. — Sputnik. Улуттук коопсуздук мамлекеттик комитети Россиянын күч органдарына Санкт-Петербургдагы жардырууну иликтөөгө колдон келген кызматын көрсөтүп жатат. Бул тууралуу аталган комитеттин маалымат кызматы кабарлады.
Буга чейин айрым маалымат булактарында КР коопсуздук кызматы террорчулукка шектелген жаран Кыргызстанда төрөлгөндүгүн тактады деген билдирүүлөр тараган.
"Бул маалымат азырынча так далилдене элек. УКМК Санкт-Петербургдагы теракт боюнча Россиянын Тергөө комитети тарабынан иликтөө иштери жүрүп жатканын баса белгилейт. Кайсыл бир адамдын кылмышка шектүү экендигин Россиянын компетенттүү органдары гана тактап туруп айта алат", — деп жазылат маалыматта.
Ошол эле учурда УКМК кылмышка шектүү делген адамга байланыштуу иштерди иликтөөгө колдон келген кызматын көрсөтүп жатканын белгиледи. Мамлекеттик комитет жалпыга маалымдоо каражаттарын элге туура жана такталган маалымат таркатууга чакырып, күч түзүмдөрүнө таянып далилденбеген кабар жарыялоодон алыс болуну эскертти.
3-апрелде Санкт-Петербургдагы "Сенная площадь" жана "Технологический институт" метро станцияларынын ортосунда жардыруу болгон.
Террорчулукка каршы күрөшүү Улуттук комитетинин маалыматына ылайык, акыркы маалыматтар боюнча 14 адам каза болуп, элүүгө жакын адам түрдүү жаракаттарды алган.
