БИШКЕК, 7-апр. — Sputnik. Борбордогу №3 балдар ооруканасынын алдында КТРКнын журналисти, күзөтчү жана окуучу бала менен болгон жаңжал видеокамерага түшүп калган.
Бүгүн эртең менен Бишкек ШИИБдин маалымат кызматы оорукана алдында жаңжал чыгып сегиз өспүрүм бала журналистти сабап кеткени турасында кабарлаган.
Sputnik Кыргызстан агенттиги жабырлануучу Алымбек Адылбеков менен байланышканда, окуя болгон күнү ал ооруканада жаткан тууганын абалын суроо үчүн келинчеги, балдызы, бажасы жана жездеси болуп бешөө барганын айтты.
"Күзөтчү эч кимди киргизбей жатыптыр. Сыртта күтүп турсак, эки-үч аял унчукпай эле кирип кетти. Алардын артынан келинчегим да кирүүгө аракет кылганда, күзөтчү анын кош бойлуу экенине карабай түртүп жиберди. Ачуум келип аны менен жакалаша кеттим. Бир маалда ары жакта турган бир бала келип ортого түшүп жатып мени бет талаштыра коюп жиберди. Окуя болгондон кийин кайра ондой баланы ээрчитип келип көптөп сабап киришти. Бирөө колундагы бычак менен коркутканынан, аны кармап өзүбүз милиция бөлүмүнө алып бардык. Артынан жанагы достору эки унаа болуп келишкен", — деди журналист.
"Журналистти оорукана күзөтчүсү киргизбей койгондо жаңжал чыгып кеткен. Менин досум аларды ажыратууга аракет кылган, ошол учурда журналисттин жакындары аны уруп салышкан. Анан ал да үч досун чакырып ызы-чуу башталган. Алар дагы тобу менен келип бизди ура баштаганда качып кеткенбиз. Артыбыздан таш ыргытканда менин башыма тийди. Анан ал журналист бир баланы кармап милиция бөлүмүнө алып барып арыз жазып койду", — деди окуучу.
Бул ишти Бишкек ШИИБи өз көзөмөлүнө аларын убадалаган. Учурда сот-медициналык экспертиза түзүлүп, иликтөө иштери уланып жатат.
