БИШКЕК, 12-апр. — Sputnik. Улуу Ата мекендик согуштун ардагерлерине тургузулган эстеликти реставрация кылуу үчүн алынган насыя соттук териштирүүгө негиз болду. Бул тууралуу Sputnik Кыргызстан агенттигине Жалал-Абад облусуна караштуу Шекафтар айылынын тургуну Рашит Гизатулин билдирди.
Эске сала кетсек, Гизатулин 2015-жылы айылдагы согуш баатырларына арналган эстеликти оңдоо үчүн 95 миң сом насыя алган.
Анын айтымында, насыяны жакын санаалашы жана айылдаш аял менен чогуу алган. Гизатулин менен санаалашы насыянын 100 миң сомун төлөп, айылдаш аялы калган 25 миң сомун төлөөдөн баш тарткан.
"Мага микрокредиттик компаниянын адистери келип, калган акчаны төлөгүлө деди. Бирок мен төлөөдөн баш тарттым. Анткени мен карызымдан кутулгам. Алар сотко берип, анын чечими менен акчасын төлөөдөн баш тарткан айылдашымды карызын төлөөгө милдеттендирди. Соттун чечиминен кийин ал акчаны кайтарып берүүгө макул болду", — деди Гизатулин.
Эстелик оңдоп-түзөөдөн кийин 2015-жылы 9-майда ачылган.
