БИШКЕК, 12-апр. — Sputnik. Акылдуу эсептегичтер эсептеген акча менен 900дөй колдонуучу макул эместигин билдирип арызданганын "Түндүкэлектр" ААКтын башкы директорунун коммерциялык маселелер боюнча орун басары Тилебалды Жаңыбаев Sputnik Кыргызстандын мультимедиалык маалымат борборундагы жыйында билдирди.
"Январда бизге чыгып келген счеттер боюнча 900дөй арыз келип түштү. Кайрылгандардын жарымы акылдуу эсептегичтердин жанына эски эсептегичтерди да коюуну суранышты. Бирок, эски эсептегич менен жаңынын чыгарган счетторунун айырмасы көп деле билинбейт. Жаңылары так иштейт", — деди Жаңыбаев.
Ал ошондой эле жаңы эсептегичтерди коюу менен электр зымдардагы чыңалуу азайып, авария дагы төмөндөгөнүн кошумчалады.
"Электр энергиясын көп колдонгон учурда биздин жабдуулардын керектен чыгышы азайды", — деди ал.
Белгилей кетсек, акылдуу эсептегичтер 2012-жылдан тарта коюла баштаган.
